ختامُها مسك/ ( نهاية تحدي ال٢٩ يوم♥️)

هلاوووووووووو 

عُدنا اليكم بعد ١٠ ايام من اخر مدونه تقريباً 

جداً متحمسه انو احجيلكم واختصرلكم هاي ال٢٩ يوم بمدونه وحده 

نعيد الزمن الى الوراء قليلاً 

بأحد ايام الشهر السابق چنت وكـ غيري من المشتركين طفشانه وگاعده اتصفح الانستا ( بعدما سمعت الجمله المشهوره من ماما ) گومي اكلي سويلج شي يفيدج بدل گعدتج هاي + ترا النقال مايفيدج لاتتأملين بي شي 

وانا كلعاده اخذها على محمل المُزاح استمريت اتصفح الانستا وبالصدفه شفت مرتضى منزل ستوري على حسابه  

وقريت الستوري عرفت انو مرتضى جان يحجي عن تحدي وهيج ف من قبل انا حابه اشارك بوحده من الحبشكلات اليسويهم هذا الشاب الطاش طشة للستار  المهم حاولت ادخل للقناة مال تلي الخاصه بهذا التحدي بس للاسف الشديد ماعرفت حاولت مرتين ماگدرت غلست ع الموضوع كله وطلعت من الانستا 

بعديها بيوم لگيت وحده من البنات المتابعتهم ع الانستا ( زينب صفاء) ناشره على حسابها كلام عن التحدي نفسه ف قررت انو خلاص احاول واحاول لمن اعرف شلون ادخل لقناة التحدي ف بعدين عرفت ودخلت للقناة وبدت الرحله العميقه هاي 

جنت داخله للتحدي وانا ماعندي اي شي اقدمه اي هوايه او موهبه ماعندي مجرد داخله حتى اتعلم الالتزام حتى اعرف شلون ارتب وقتي شلون راح انسق بين دراستي امتحاناتي دوامي وكذلك اضيف المشي ليومي حتى صحتي وقلبي يتحسنون 

بديت وياهم ومن اول يوم تعرفت ع  عدد من المشتركين اللطيفين 

كانو كلهم حبابين وياي ويتفهمون الطريقه الاحجي بيها يتفهمون كلشي وماصارت ابداً اي مشكله بينه وهذا الشي خلاني اتعرف عليهم اكثر واعرف طموحاتهم وهواياتهم 

طبعاً احد شروط التحدي انو كل ٣ ايام بنهايتها نملي استماره بعدد مُحدد من الكلمات ونرفق بيها ٣ صور لتقدمنه او فيد ٣٠ ثانيه 

كنه نتشارك هاي المدونات بالگروب نقرا مدونات بعض نصحح الاخطاء نركز ع مناطق التطور بهذا المُشترك نشوف شنو استخدم حتى يطور موهبته وشنو العراقيل الواجهته وندعم بعض بكل انواع الدعم النفسي

حتى صرنه نطلب من المشتركين يرسلونه فد شي من موهبتهم مثلاً جنه نطلب منهم انو يرسلونه فيد للعزف مالتهم على العود او  البيانو 

بحيث صار الگروب عباره عن شارع المُتنبي بس الكتروني من تدخله تسمع العزف العراقي القديم والفن والتحدث بلُغات مختلفه والاذواق المُتنوعه والنصوص الادبيه المُذهله 

حتى صرت اراويهم لماما اشوفها مواهب المُشتركين جانت تحب تسمع فيديوات العزف وتشوف الرسم او التصميم وصارت مقتنعه انو الفون اله فايده والنت اذا استخدمنا بالاستخدام الصحيح راح نربح هواي معلومات منه 

نسيت اذكرلكم انو  بنهاية ال١٠ ايام تنزل استماره مختلفه شوي هم نكتب بيها تطورنه وندرج بيها رابط مدونتنه هاي المدونه تلخص الصار بال١٠ ايام السابقه 

طبعاً للعلم انا جنت ماعرف شنو الblogger ولاعرف شنو مدونات 

هذا التحدي علمنه هواي امور 

الالتزام 

الصبر 

الحوار 

التعامل مع الناس 

احترام الاراء 

حب الذات والثقه بالنفس 

تطوير الموهبه وتجاوز العقد المرسومة في طريق الموهبه 

قبل التحدي جانت نضرتنه سطحيه لكلشي بالحياة وبعد التحدي صار عدنه تمعُن اكثر ودقه اكثر

وكذلك صار عدنه اطلاع على الكثير من التوجهات المُستقبليه بحيث صرت اعرف شنو المجال الحابه اطوره بنفسي واكيد اختاريت وحددت اهدافي للاشهر القادمه وان شاء الله اتوفق بتحقيق هاي الاهداف 

حتى صارت عندي خبره بالدورات الالكترونيه والورش الجاي تنعرض ع المنصات الالكترونيه والاغلبها مجانيه وتقدم شهادات مُعتمده طبعاً هذا الشي كذلك عرفته من المتابعين وهسه انا حصلت شهاده وبالاسبوع الجاي احصل شهاده ثانيه ان شاء الله 

انا جانت رغبتي من التحدي انو امشي ٢ كيلو متر يومياً لكن بالعشر ايام الثانيه من ال٢٩ يوم صرت امشي ٤ كيلو متر ومرات اكثر لان تحمست وصرت ماتعب من ال٢ كيلو متر 

بهذا الفيد راح احجيلكم شوي عن تقدمي وفايدتي من هذا التحدي

طبعاً تدربت ع الكلام ستالاف مره ياله طلع هيج اتمنى اكون وصلت الفكره الكم 

وطبعاً واكيد تعلمت انگليزي وتطورت باللغه الانگليزيه وجداً فخوره بهذا الشي 

و نزلت فيد على حسابي بالانستگرام حچيت بي عن التحدي وكان باللغه الانگليزيه 

احب اشكر كل الناس الكانت تدعمني وتوگف جنباً الى جنب بكل خطواتي 

اتمنى من الله انو يوفق مرتضى والفريق اليشتغل ويا حتى يقدمون اكثر للناس 

وان شاء الله في يوم من الايام راح يفختر مرتضى بيه لان ماراح اوگف عند هذا الحد وتحدي مرتضى خلاني ارجع اكمل مخططاتي لمشروعي واصر ع تحقيقه اكثر واكثر حتى اكدر انقذ ذوي الاحتياجات الخاصه ومحاربين السرطان من الوضع العايشين بي 

♥️